ಉಷ್ಟ್ರಪಕ್ಷಿ  ವಿದೇಶೀ ಅಲ್ಲ

ಕಣಜ ಅಂತರಜಾಲ ಕನ್ನಡ ಕೋಶದಲ್ಲಿ ಪ್ರಕಟವಾದ ನನ್ನ ಲೇಖನ.

http://kanaja.in/?p=134436

Advertisements
Published in: on ಏಪ್ರಿಲ್ 20, 2017 at 6:11 ಅಪರಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಜೇಡರಣ್ಣನ ಬಣ್ಣದ ಗುಟ್ಟು

ಇಪತ್ರಿಕೆ.ಕಾಮ್ (epathrike.com) ನಲ್ಲಿ ನಿನ್ನೆ ಪ್ರಕಟವಾದ ಲೇಖನ ಇಲ್ಲಿದೆ.18042017

ಲೇಖನದ ಜೊತೆಗೆ ಚಿತ್ರಗಳೂ ಇದ್ದುವು. ಪತ್ರಿಕೆಯಲ್ಲಿ ಸ್ಥಳಾಭಾವದಿಂದಾಗಿ ಅವನ್ನು ಸಂಪಾದಕರು ಒತ್ತಟ್ಟಿಗಿಟ್ಟಿದ್ದಾರೆ. ಇದೋ ಇಲ್ಲಿವೆ ಆ ಚಿತ್ರಗಳು:

differentbluetarantula-courtesyT.Patterson

ಟರಾಂಟುಲ ನೀಲಿ ಜೇಡಗಳಲ್ಲಿ ಎಷ್ಟೊಂದು ಬಗೆ! (ಚಿತ್ರ ಕೃಪೆ: ಟಿ. ಪ್ಯಾಟರ್ಸನ್ (Courtesy: T. Patterson)

tarantulahairscolourscrosssection

ವಿಭಿನ್ನ ಟರಾಂಟುಲ ಜೇಡಗಳ ರೋಮಗಳು. ಎಡದ ಕಂಭದಲ್ಲಿ ಬೆಳಕಿನಲ್ಲಿ ಅವು ಸೂಸುವ ನೀಲಿ ಬಣ್ಣ. ಮಧ್ಯದ ಕಂಭಸಾಲಿನಲ್ಲಿ ಸೂಕ್ಷ್ಮದರ್ಶಕದಡಿಯಲ್ಲಿ ಅವುಗಳ ರಚನೆ ಹಾಗೂ ಕೊನೆಯ ಕಂಭಸಾಲಿನಲ್ಲಿ ರೋಮವನ್ನು ಕುಯ್ದಾಗ ಕಾಣುವ ರಚನೆ. ಬಲತುದಿಯ ಕೆಳಗಿನ ಚಿತ್ರದಲ್ಲಿ ರೋಮ ಗಾಢ ನೀಲಿ ಬಣ್ಣ ತೋರುವುದನ್ನೂ, ಅದಕ್ಕೆ ತಕ್ಕಂತೆ ಅದರ ಸಮ್ಮಿತಿ ಯನ್ನೂ ಗಮನಿಸಿ. Photo courtesy ಆಕರ 3

ಆಕರ:

1.Jyothi Madhusoodhan, Tarantula tint inspires new ways of making colours, PNAS, PNAS | April 4, 2017 | vol. 114 | no. 14 | 3547–3549  (http://www.pnas.org/cgi/doi/10.1073/pnas.1702304114)

2. Hsiung BK, et al. (2016) Tarantula-inspired noniridescent photonics with long-range order. Advanced Optical Materials, 10.1002/ adom.201600599

3. Hsiung BK, Deheyn DD, Shawkey MD, Blackledge TA (2015) Blue reflectance in tarantulas is evolutionarily conserved despite nanostructural diversity. Sci Adv 1(10):e1500709

 

Published in: on ಏಪ್ರಿಲ್ 19, 2017 at 5:54 ಫೂರ್ವಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಸಗಣಿ ದುಂಬಿಯ ಜೀಪಿಎಸ್

Published in: on ಏಪ್ರಿಲ್ 11, 2017 at 1:03 ಅಪರಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಬೂಸಿಗೆಷ್ಟು ಬೆಲೆ

ಇಂದಿನ  ಇ-ಪತ್ರಿಕೆ. ಕಾಮ್ ನಲ್ಲಿ ಪ್ರಕಟವಾಗಿರುವ ನನ್ನ ಲೇಖನ. ಮೊನ್ನೆ ಅಲೆಕ್ಸಾಂಡರ್ ಫ್ಲೆಮಿಂಗನ ಸಂಗ್ರಹದಲ್ಲಿದ್ದ ಪೆನಿಸಿಲಿಯಮ್ ಬೂಸಿನ ತುಣುಕೊಂದನ್ನು 15000 ಡಾಲರುಗಳ ಮೊತ್ತಕ್ಕೆ ಹರಾಜು ಹಾಕಲಾಯಿತು. ಆದರೆ ಕೋಟ್ಯಂತರ ಜನರನ್ನು ಬದುಕಿಸಿದ ಪೆನಿಸಿಲಿನ್ ಶೋಧಕ್ಕೆ ಬೆಲೆ ಕಟ್ಟಲಾಗದು. ಇಂತಹ ಉಪಯುಕ್ತ ಬೂಸುಗಳು ಎಷ್ಟಿವೆಯೋ?

My write-up in epathrike.com on the auction of a bit of penicillium from Alexander Fleming’s collection. We don’t know how many such fungus and other lower plants animals are there that can be beneficial to us and are yet to come to light!

04042017

 

Published in: on ಏಪ್ರಿಲ್ 4, 2017 at 6:57 ಫೂರ್ವಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಹಕ್ಕಿಯ ಹಾಡು ಕೇಳಿದಿರಾ?

ಇಪತ್ರಿಕೆ.ಕಾಮ್ ನ 14.03.2017 ಸಂಚಿಕೆಯಲ್ಲಿ ಪ್ರಕಟವಾದ ಲೇಖನ

14032017

ಲೇಖನಕ್ಕೆ ಇಲ್ಲಿದೆ ಕೊಂಡಿ.

ಹೆಚ್ಚಿನ ಓದಿಗೆ:

  1. Snowdon,C.T.,Teie,D.,andSavage,M.(2015).Catspreferspecies- appropriatemusic. Anim.Behav.Sci. 166,106–111.doi: 10.1016/j.applanim.2015.02.012
  2. http://www.the-scientist.com/?articles.view/articleNo/48532/title/Music-Tailored-to-Animals–Tastes

 

ಮೀನಿನಿಂದ ಬಾವಲಿಯವರೆಗಿನ ವಿವಿಧ ಪ್ರಾಣಿಗಳ ಹಾಡುಗಳನ್ನು ಇಲ್ಲಿ ಕೇಳಿ ಆನಂದಿಸಿ.

 

Published in: on ಮಾರ್ಚ್ 28, 2017 at 7:25 ಫೂರ್ವಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಲೋಕವನ್ನು ಮರೆತವರು

ಇಪತ್ರಿಕೆ ದಿನಾಂಕ 29.3.2017 ಸಂಚಿಕೆಯಲ್ಲಿ ಪ್ರಕಟವಾದ ಲೇಖನ

29032017

ಇದರ ಕೊಂಡಿ ಇಲ್ಲಿದೆ

ಹೆಚ್ಚಿನ ಓದಿಗೆ:

  • Ryan K.C. Yuen et al., Whole genome sequencing resource identifies 18 new candidate genes for autism spectrum disorder Nature Neuroscience (2017) doi:10.1038/nn.4524, published online 7 March 2017

 

Published in: on ಮಾರ್ಚ್ 28, 2017 at 7:17 ಫೂರ್ವಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ನೀನ್ಯಾರಿಗಾದೆಯೋ ಎಲೆ ಮಾನವ?

ಇಪತ್ರಿಕೆ.ಕಾಮ್ ನ 21 ಮಾರ್ಚ್ 2017 ಸಂಚಿಕೆಯಲ್ಲಿ ಪ್ರಕಟವಾದ ನನ್ನ ಲೇಖನ.

21032017

ಇದರ ಕೊಂಡಿ ಇಲ್ಲಿದೆ

ಹೆಚ್ಚಿನ  ಓದಿಗೆ:

  1. Rutz C, Sugasawa S, van der Wal JEM, Klump BC, St Clair JJH. 2016 Tool bending in New Caledonian crows. Soc. open sci.3: 160439. http://dx.doi.org/10.1098/rsos.160439
  2. Auersperg AMI, Borasinski S, Laumer I, Kacelnik A. 2016 Goffin’s cockatoos make the same tool type from different materials. Lett. 12: 20160689. (http://dx.doi.org/10.1098/rsbl.2016.0689)
  3. Leeuwen, E. J. C. et al. Tool use for corpse cleaning in chimpanzees. Rep. 7, 44091; doi: 10.1038/srep44091 (2017)

ಕಾಗೆಯ ಕೈಚಳಕ (ಕೊಕ್ಕಿನ ಚಳಕ?) ವೀಡಿಯೋ ಇಲ್ಲಿದೆ. ಗಿಳಿರಾಮನದ್ದು ಇಲ್ಲಿದೆ.

Published in: on ಮಾರ್ಚ್ 28, 2017 at 7:08 ಫೂರ್ವಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಸೀನಿನ ಲೆಕ್ಕಾಚಾರ

06062016

ಹೆಚ್ಚಿನ ಓದಿಗೆ:

E. Scharfmann, A. H. Techet, J. W. M. Bush, L. Bourouiba (2016) Visualization of Sneeze Ejecta: steps of fluid fragmentation leading to respiratory droplets. Exp. Fluids 57:24, doi:10.1007/s00348-015-2078-4

ನಾನು ಸೀನಿದಾಗಲೆಲ್ಲ ಕೇಳುತ್ತಿದ್ದ ಮಾತು. “ಅಯ್ಯೋ. ಒಂಟಿ ಸೀನು ಸೀನಿಬಿಟ್ಟೆಯಲ್ಲೋ? ಇನ್ನೊಂದು ಸೀನು ಸೀನಿಬಿಡು.” ಇದು ಅಮ್ಮ ಸೀನಿನಿಂದ ನಾನು ಪಡುತ್ತಿದ್ದ ಅವಸ್ಥೆಯನ್ನು ಕಂಡು ತಮಾಷೆ ಮಾಡಲು ಹೇಳುತ್ತಿದ್ದಳೋ, ಅಥವಾ ಸೀನಿದ್ದರಿಂದಾದ ಮುಜುಗರ ಕಡಿಮೆಯಾಗುವಂತೆ ಸಮಾಧಾನ ಮಾಡಲು ಹೇಳುತ್ತಿದ್ದಳೋ ಗೊತ್ತಿಲ್ಲ. ಒಟ್ಟಾರೆ ಸೀನುವುದು ಎಂದರೆ ಕಸಿವಿಸಿಯ ವಿಷಯ ಎನ್ನುವುದಂತೂ ಮನಸ್ಸಿನಲ್ಲಿ ಗಟ್ಟಿಯಾಗಿ ನೆಲೆಯಾಗಿ ಬಿಟ್ಟಿದೆ. ಅಮ್ಮ ಏನೋ ಇನ್ನೊಮ್ಮೆ ಸೀನು ಎಂದು ಬಿಡುತ್ತಿದ್ದಳು. ಆದರೆ ಹಾಗೆ ಬೇಕೆಂದ ಹಾಗೆ, ಬೇಕಾದಷ್ಟು ಬಾರಿ ಸೀನಲು ಆದೀತೇ? ಅದೇನು ನಮ್ಮ ಮಾತು ಕೇಳುವ ವಿದ್ಯಮಾನವೇ?

ಹೀಗೆಂದು ನಾವು ನೀವು ಹೇಳಿಬಿಡಬಹುದು. ಆದರೆ ಅಮೆರಿಕದ ತಂತ್ರಜ್ಞಾನದ ಕಾಶಿ ಮಸ್ಯಾಚುಸೆಟ್ಸ್ ಇನ್ಸ್ ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಎಂಐಟಿ) ಯಲ್ಲಿ ಭೌತವಿಜ್ಞಾನಿಯಾಗಿರುವ ಲಿಡಿಯಾ ಬೋರೊಯಿಬಾ ಹೀಗೆನ್ನುವುದಿಲ್ಲ. ಹಾಗಂತ ಆಕೆಗೆ ಸದಾ ಸೀನುವ ಖಾಯಿಲೆ ಇದೆ ಎನ್ನಬೇಡಿ. ಆಕೆ ಸೀನಿನ ಭೌತಶಾಸ್ತ್ರವನ್ನು ಲೆಕ್ಕ ಹಾಕುತ್ತಿರುವ ವಿಜ್ಞಾನಿ ಅಷ್ಟೆ. ಬೇಕೆಂದಾಗ ನಿಮಗೆ ಸೀನು ತರಿಸಿ, ನೀವು ಸೀನುವ ಸಂದರ್ಭದಲ್ಲಿ ನಡೆಯುವ ವಿದ್ಯಮಾನವನ್ನು ಕೂಲಂಕಷವಾಗಿ ಲೆಕ್ಕಾಚಾರ ಹಾಕುವ ಕೆಲಸದಲ್ಲಿ ಲಿಡಿಯಾ ನಿರತೆ. ಈಕೆಯ ಪ್ರಕಾರ ಸೀನುವ ಬಗ್ಗೆ ನಮಗೆ ಹೆಚ್ಚೇನೂ ತಿಳಿದಿಲ್ಲವಂತೆ.

ನಿಜ. ಮೂಗಿಗೆ ಒಂದಿಷ್ಟು ಕಿರಿಕಿರಿಯಾದಾಗ ಫಟಾರನೆ ಆಗುವ ಮಹಾಸ್ಫೋಟವೇ ಸೀನು. ಮೆಣಸಿನ ಪುಡಿ, ದೂಳಿನಂತಹ ಕಿರಿಕಿರಿಯುಂಟು ಮಾಡುವ ವಸ್ತುಗಳು ಮೂಗಿನೊಳಗೆ ಹೊಕ್ಕಾಗ ಅವನ್ನು ಹೊರದೂಡಲು ನಮಗೆ ಪ್ರಕೃತಿ ನೀಡಿರುವ ವರ ಇದು ಎನ್ನುತ್ತಾರೆ ಜೀವಿವಿಜ್ಞಾನಿಗಳು. ಸೀನಲು ಕಾರದ ಪುಡಿಯೋ, ನಶ್ಯವೋ ಇರಲೇ ಬೇಕೆಂದಿಲ್ಲ. ಉಸಿರಾಟದ ಅಂಗಗಳಿಗೆ ಸೂಕ್ಷ್ಮಾಣುಗಳು ಸೋಂಕಿ ಕಾಯಿಲೆಯಾದಾಗಲೂ ಸೀನು ಬರುವುದುಂಟು. ಸಾಮಾನ್ಯವಾಗಿ ನೆಗಡಿ, ಫ್ಲೂ, ಮುಂತಾದ ಸೋಂಕುಗಳಾದಾಗಲೂ ಸೀನುವುದು ಇದ್ದದ್ದೇ. ಸೀನಿನ ಹಾಗೆಯೇ ಕೆಮ್ಮೂ ಕೂಡ ಸ್ಫೋಟಕ ವಿದ್ಯಮಾನ. ಎರಡೂ ಸಂದರ್ಭಗಳಲ್ಲಿ ಬಲೂನು ಒಡೆದಂತೆ ಇದ್ದಕ್ಕಿದ್ದ ಹಾಗೆ ಗಾಳಿ ಎದೆಯೊತ್ತಿಕೊಂಡು ಬಂದು ಹೊರಗಡೆಗೆ ಸ್ಫೋಟಿಸುತ್ತದೆ. ಜೊತೆಗೆ ಮೂಗಿನಲ್ಲಿರುವ ಸಣ್ಣ ಕಣಗಳನ್ನೂ, ಹನಿಗಳನ್ನೂ ಹೊತ್ತು ಬರುತ್ತದೆ. ಇದುವೇ ಸೀನು. ಬಾಯಿಯಿಂದ ಬಂದಾಗ ಅದು ಕೆಮ್ಮು.

ಕೆಮ್ಮು ಮತ್ತು ಸೀನಿನ ಬಗ್ಗೆ ವೈದ್ಯರಿಗೆ ಬಲು ಕಾಳಜಿ. ಏಕೆಂದರೆ ಹಲವು ರೋಗಗಳು ಹರಡುವುದಕ್ಕೆ ಇವು ಮುಖ್ಯ ಕಾರಣವೆಂದು ಅವರು ನಂಬಿಕೆ. ಸೀನಿದಾಗ ಗಾಳಿಯ ಜೊತೆ ಹೊರಬೀಳುವ ಸಣ್ಣ ಹನಿಗಳು ರೋಗಾಣುಗಳನ್ನು ಹೊತ್ತೊಯ್ಯುತ್ತವೆ. ಗಾಳಿಯಲ್ಲಿ ಹರಡುತ್ತವೆ. ಜೊತೆಗೇ ಹನಿಗಳು ಸೂಕ್ಷ್ಮವಾಗಿದ್ದಷ್ಟೂ ಹೆಚ್ಚೆಚ್ಚು ದೂರಕ್ಕೆ ಪಸರಿಸುತ್ತವೆ ಎನ್ನುವುದು ವೈದ್ಯರ ನಂಬಿಕೆ. ಆದ್ದರಿಂದಲೇ ನೆಗಡಿಯಾದವರ ಬಳಿ ಹೋಗಬೇಡಿ ಎನ್ನುವ ಸಲಹೆ. ಸಮೀಪ ಹೋಗಬೇಡಿ ಎಂದರೆ ಎಷ್ಟು ಸಮೀಪ? ಕೋಣೆಯ ಈ ತುದಿಯಲ್ಲಿ ಕುಳಿತುಕೊಂಡು ಆ ತುದಿಯಲ್ಲಿರುವ ಕೆಮ್ಮಿನ ರೋಗಿಯನ್ನು ಮಾತನಾಡಿಸಿದರೆ ಕ್ಷೇಮವಿರಬಹುದೇ? ಅಥವಾ ಇನ್ನೂ ಹತ್ತಿರ ಹೋದರೆ ತೊಂದರೆಯಿಲ್ಲವೇ? ಈ ಪ್ರಶ್ನೆಗಳಿಗೆ ಬಹುಶಃ ವೈದ್ಯರೂ ಉತ್ತರ ಹೇಳರು. ಲಿಡಿಯಾಳ ಸಂಶೋಧನೆಯ ಗಮನವೆಲ್ಲವೂ ಇಂತಹ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳುವುದರತ್ತ ಎಂದರೆ ತಪ್ಪೇನಿಲ್ಲ.

ಲಿಡಿಯಾ ಪ್ರಕಾರ ಸೀನು ಮತ್ತು ಕೆಮ್ಮು ದ್ರವಚಲನೆಯ ವಿದ್ಯಮಾನಗಳು. ಅರ್ಥಾತ್, ದ್ರವ ಪದಾರ್ಥಗಳು ಗಾಳಿಯಲ್ಲಿ ಚಲಿಸುವ ಘಟನೆಗಳು. ಚಿಲುಮೆಯಿಂದ ಚಿಮ್ಮುವ ನೀರಿನ ಹನಿಗಳು ಚಲಿಸುವಂತೆಯೇ ಇಲ್ಲಿಯೂ ಹನಿಗಳು ಚಲಿಸುತ್ತವೆ. ಆದ್ದರಿಂದ ಈ ಹನಿಗಳ ಚಲನೆಗೂ ಸೀನುವಾಗ ಉಂಟಾಗುವ ಸ್ಫೋಟ (ಗಾಳಿಯ ಒತ್ತಡ) ದ ಬಲ ಹಾಗೂ ಉಸಿರಿನಲ್ಲಿರುವ ದ್ರವದ ಪ್ರಮಾಣಕ್ಕೂ ಸಂಬಂಧವಿರಬೇಕು. ಇದನ್ನು ಅಧ್ಯಯನ ಮಾಡಿದರೆ ಬಹುಶಃ ಸೀನಿದಾಗ ಹನಿಗಳೆಷ್ಟು ದೂರ ಹಾರಿಯಾವೆಂದು ಊಹಿಸಬಹುದು? ಅದಕ್ಕೆ ತಕ್ಕಂತೆ ರೋಗಿಗಳಿಂದ ದೂರವಿರಲೂ ಪ್ರಯತ್ನಸಿಬಹುದು.

ನಿಜ. ಇದು ದ್ರವಚಲನೆಯ ವಿದ್ಯಮಾನ. ಆದರೆ ಇಲ್ಲಿರುವ ದ್ರವದ ಹನಿಗಳು ಮಳೆಯ ಹನಿಗಳಂತೆಯೋ, ಚಿಲುಮೆಯಿಂದ ಸಿಂಪರಿಸುವ ಹನಿಗಳಂತೆಯೇ ಏಕರೂಪದವಲ್ಲ. ನೀರಿನಂತಹ ಉಗುಳು, ಅಂಟಿನಂತಹ ಸಿಂಬಳ ಮತ್ತು ಗಾಳಿ ಇವೆಲ್ಲವೂ ಕೂಡಿ ಉಂಟಾದ ವಿಶಿಷ್ಟ ದ್ರವ. ಈ ದ್ರವದ ಚಲನೆಯ ವೈಶಿಷ್ಟ್ಯವೇನೆಂದು ತಿಳಿದಲ್ಲಿ ಅವು ಚಲಿಸುವ ದಿಕ್ಕು, ದೂರವನ್ನೆಲ್ಲ ಊಹಿಸಬಹುದು. ಹೀಗೆಂದು ಆಲೋಚಿಸಿರುವ ಲಿಡಿಯಾ ಬೇಕೆಂದಾಗ ಸೀನುವಂತೆ ಮಾಡಿ ಸೀನಿನ ವೀಡಿಯೊ ಚಿತ್ರಣ ತೆಗೆಯುತ್ತಾರೆ. ಪ್ರತಿ ಸೆಕೆಂಡಿಗೆ ನೂರಕ್ಕೂ ಹೆಚ್ಚು ಚಿತ್ರ ತೆಗೆಯುವ ತೀವ್ರಗತಿಯ ಛಾಯಾಗ್ರಹಣ ತಂತ್ರವನ್ನು ಈಕೆ ಬಳಸುತ್ತಾರೆ. ಹೀಗೆ ದೊರೆತ ವೀಡಿಯೋ ಚಿತ್ರದಲ್ಲಿ ಸೀನಿದಾಗ ಉಂಟಾಗುವ ಕಣಗಳು ಹೇಗೆ ಹರಡಿಕೊಳ್ಳುತ್ತವೆ ಎನ್ನುವುದನ್ನು ಗಮನಿಸಿ, ಅದಕ್ಕಾಗಿ ಒಂದು ಗಣೀತೀಯ ಮಾದರಿ (ಸೂತ್ರ) ವನ್ನು ರೂಪಿಸಿದ್ದಾರೆ. ಈ ಮಾದರಿ ಸೀನಿದಾಗ ಬಾಯಿಯಿಂದ ಹೊರಬಂದ ಹನಿಗಳು ಎತ್ತ ಮತ್ತು ಹೇಗೆ ಪಸರಿಸುತ್ತವೆ ಎಂದು ಲೆಕ್ಕ ಹಾಕಬಲ್ಲವು. ಸೀನಿನ ಸ್ಪಷ್ಟ ಚಿತ್ರವನ್ನು ತೋರಬಲ್ಲವು.

sneezedynamics

ಸೀನು ಎಂದರೆ ಒಂದು ಮಹಾಸ್ಫೋಟವಷ್ಟೆ. ಎದೆಯೊಳಗಿನ ಗಾಳಿಯ ಒತ್ತಡ ಇದ್ದಕ್ಕಿದ್ದ ಹಾಗೆ ಹೆಚ್ಚಿ, ಥಟ್ಟನೆ ಬಾಯಿ-ಮೂಗಿನಿಂದ ಹೊರ ಚಿಮ್ಮುತ್ತದೆ. ಹೀಗೆ ಒತ್ತಡ ಹೆಚ್ಚಾಗುವಂತೆ ಮಾಡುವ ದೇಹದ ಕ್ರಿಯೆಗಳ ಕಥೆಯೇ ಬೇರೆ. ಅದು ಇಲ್ಲಿ ಬೇಡ. ಆದರೆ ಸ್ಫೋಟಗೊಂಡು ಹೊರ ಬಂದ ಸೀನಿನ ಗಾಳಿ ಮೊದಲಿಗೆ ದುಂಡಗಿನ ಬಲೂನಿನಂತೆಯೇ ಇರುತ್ತದೆ. ಕ್ರಮೇಣ ಸುತ್ತಲಿನ ಗಾಳಿಯ ಒತ್ತಡಕ್ಕೆ ಅನುಗುಣವಾಗಿ ದೊಡ್ಡದಾಗುತ್ತದೆ. ಹಾಗೆಯೇ ಸುತ್ತಲಿನ ಗಾಳಿಯನ್ನು ಒಳಗೆ ಸೆಳೆದುಕೊಂಡು ಒಡೆಯುತ್ತದೆ. ಹಲವು ಬಲೂನುಗಳಾಗುತ್ತದೆ.

ಈ ಹಿಂದೆಯೂ ಇಂತಹ ಚಿತ್ರಗಳನ್ನು ತೆಗೆಯಲಾಗಿತ್ತು. ಆದರೆ ಹನಿಗಳ ಚಲನೆಯನ್ನು ಲಿಡಿಯಾ ಮಾಡಿರುವಂತೆ ಕೂಲಂಕಷವಾಗಿ ಮಾಡಿರಲಿಲ್ಲ. ಬಾಯಿ-ಮೂಗಿನಿಂದ ಹೊರ ಬಂದ ಹನಿಗಳು ಬಿಡಿ, ಬಿಡಿಯಾಗಿ ಹರಡಿಕೊಳ್ಳುತ್ತವೆಂದು ಇದುರವೆಗೂ ತಿಳಿಯಲಾಗಿತ್ತು. ಆದರೆ ಲಿಡಿಯಾ ತೆಗೆದಿರುವ ವೀಡಿಯೋಗಳು ತಿಳಿಸುವುದೇ ಬೇರೆ. ಎಲ್ಲ ಹನಿಗಳೂ ಬಿಡಿಯಾಗಿರುವುದಿಲ್ಲ. ಸಿಂಬಳದ ಅಂಟುತನ ಇದನ್ನು ತಡೆಗಟ್ಟುತ್ತದೆ. ಜೇಡರಬಲೆಯ ಮೇಲೆ ಹನಿಗಳು ಮುತ್ತುಗಳಂತೆ ಸಂಗ್ರಹವಾಗಿರುವುದನ್ನು ಕಂಡಿರುತ್ತೀರಲ್ಲ? ಇಲ್ಲಿಯೂ ಹಾಗೆಯೇ ಹನಿಗಳು ಸಿಂಬಳದ ಎಳೆಗಳ ಮೇಲೆ ಹರಡಿಕೊಂಡಿರುತ್ತವೆ.

ಇದರ ಪರಿಣಾಮ: ಸಣ್ಣ ಹನಿಗಳು ಕೂಡ ದೊಡ್ಡದಾಗಿ ಬೆಳೆಯಬಲ್ಲವು. ದೊಡ್ಡ ಹನಿಗಳು ಕೂಡ ಸಿಂಬಳದೆಳೆಯ ಆಸರೆಯಲ್ಲಿ ಬಲು ದೂರ ಚಲಿಸಬಲ್ಲುವು. ಕೈಯಳತೆಯ ದೂರದಲ್ಲಿದ್ದರೆ ಸೋಂಕು ತಗುಲುವುದಿಲ್ಲವೆನ್ನುವಂತಿಲ್ಲ ಎನ್ನುತ್ತಾರೆ ಲಿಡಿಯಾ. ಕೆಲವರು ಕೈ ಕುಲುಕದೆಯೇ ಕೈ ಜೋಡಿಸಿ ನಮಸ್ತೆ ಹೇಳುತ್ತಾರೆ. ಕೈ ಕುಲುಕಿದಾಗ ಬಲು ಸಮೀಪವಿರುತ್ತೇವೆಯಾದ್ದರಿಂದ ಸೋಂಕುಂಟಾಗುವ ಸಾಧ್ಯತೆ ಜಾಸ್ತಿ. ನಮಸ್ತೆ ಎಂದು ಕೈ ಜೋಡಿಸಿದರೆ ಹೀಗಾಗದು ಎನ್ನುವುದು ಇವರ ತರ್ಕ. ಫ್ಲೂ ಹಾಗೂ ಕಳೆದ ವರ್ಷ ಭಾರಿ ಸುದ್ದಿ ಮಾಡಿದ್ದ ಇಬೊಲಾ ವೈರಸ್ ಗಳು ಈ ತೆರನಾಗಿ ದೇಹ ಸಂಪರ್ಕದಿಂದಲೇ ದಾಟಿ ಬರುತ್ತವೆ. ಅಂತಹ ಸಂದರ್ಭದಲ್ಲಿ ‘ನಮಸ್ತೆ’ ನೆರವಾಗಬಹುದು. ಆದರೆ ನೆಗಡಿ ಹಾಗೂ ಹಂದಿಜ್ವರ ಅಥವಾ ಕೋಳಿಜ್ವರಗಳ ಸಂದರ್ಭದಲ್ಲಿ ಕೋಣೆಯಿಂದ ಹೊರ ಹೋದರೂ ಸೋಂಕು ಬೆಂಬತ್ತಿ ಬರಬಹುದು ಎನ್ನುತ್ತದೆ ಲಿಡಿಯಾ ರವರ ಸಂಶೋಧನೆಗಳು.

ಇದರಿಂದೇನು ಪ್ರಯೋಜನ ಎನ್ನಬೇಡಿ. ಲಿಡಿಯಾರ ಸೂತ್ರಗಳಂತೆಯೇ ಎಲ್ಲ ಸೀನಿನ ಸಂದರ್ಭಗಳೂ ಇದ್ದಲ್ಲಿ, ಗಾಳಿಯಲ್ಲಿ ಹರಡುವ ರೋಗಗಳನ್ನು ನಿಯಂತ್ರಿಸುವ ಕ್ರಮಗಳನ್ನು ಕೈಗೊಳ್ಳುವುದು ಸುಲಭವಾದೀತು ಎನ್ನುವುದು ಲಿಡಿಯಾರ ತರ್ಕ. ಅದಕ್ಕೂ ಮುನ್ನ, ಹನಿಗಳಲ್ಲಿ ಎಷ್ಟು ರೋಗಾಣುಗಳು ಇರಬಹುದು? ಎಷ್ಟು ಹನಿಗಳಿಂದ ರೋಗಗಳುಂಟಾಗಬಹುದು? ಎಂತಹ ರೋಗಾಣುಗಳು ಹೀಗೆ ಹನಿಗಳ ಮೂಲಕ ಹರಡಬಲ್ಲವು? ಇವೆಲ್ಲ ಪ್ರಶ್ನೆಗಳಿಗೂ ಉತ್ತರ ಸಿಗಬೇಕು. ಅದುವರೆವಿಗೂ ಮೂಗಿಗೆ ಬಟ್ಟೆಯನ್ನೋ, ಕರ್ಚೀಫನ್ನೋ ಕಟ್ಟಿಕೊಂಡು, ನಮಸ್ತೆ ಹೇಳುತ್ತ ಎಚ್ಚರದಿಂದಿರಬೇಕಷ್ಟೆ.

 

Published in: on ಜೂನ್ 7, 2016 at 9:06 ಅಪರಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಆಹಾ! ಕಾಂತಾ!

 

ಪ್ರಣಯದಾಟವೂ ಕಾಂತಶಕ್ತಿಯೂ

ಕೊಳ್ಳೇಗಾಲ ಶರ್ಮ

ಪ್ರಣಯದಾಟ ಕಾಂತ-ಕಾಂತೆಯರ ನಡುವೆ ನಡೆಯುತ್ತದೆ. ಅದರಲ್ಲನೇನು ವಿಶೇಷ? ಎಂದಿರಾ? ನಿಜ. ಪ್ರಣಯದಾಟ ಗಂಡು-ಹೆಣ್ಣಿನ ನಡುವಿನ ಆಕರ್ಷಣೆಯ ಫಲ. ಗಂಡು ಹೆಣ್ಣನ್ನು ಆಕರ್ಷಿಸುತ್ತದೋ, ಹೆಣ್ಣು ಗಂಡನ್ನು ಆಕರ್ಷಿಸುತ್ತದೋ, ಗೊತ್ತಿಲ್ಲ. ಒಟ್ಟಾರೆ ಸಂತಾನಾಭಿವೃದ್ಧಿಯಲ್ಲಿ ಪ್ರಣಯದಾಟಗಳು ಪ್ರಮುಖ ಪಾತ್ರ ವಹಿಸುತ್ತವೆನ್ನುವುದು ಮಾತ್ರ ನಿಜ. ಈ ಆಟ ಕೇವಲ ಹೆಣ್ಣು, ಗಂಡಿನ ನಡುವಿನ ಆಕರ್ಷಣೆಯಲ್ಲ. ಇದರಲ್ಲಿ ಈ ಭೂಮಿಯ ಕಾಂತ ಶಕ್ತಿಯ ಪ್ರಭಾವವೂ ಇದೆಯಂತೆ.

ಗಂಡು-ಹೆಣ್ಣಿನ ನಡುವೆ ನಡೆಯುವ ಪ್ರಣಯಕೇಳಿಯನ್ನು ವಿದ್ಯುತ್ ಅಥವಾ ಅಯಸ್ಕಾಂತ ಶಕ್ತಿಯು ಪ್ರಭಾವಿಸುತ್ತದೆನ್ನುವ ಸ್ವಾರಸ್ಯಕರ (ಶಾಕಿಂಗ್ ಸುದ್ದಿ ಅಂದರೂ ಸರಿಯೇ. ಆಕರ್ಷಕ ಸುದ್ದಿ ಅಂದರೂ ಸರಿಯೇ!) ಸುದ್ದಿಯನ್ನು ತೈವಾನಿನ ಚಾಂಗ್ ಗುನ್ ವಿವಿಯ ವಿಜ್ಞಾನಿ ಚಿಯಾಲಿನ್ ವೂ ಮತ್ತು ಸಂಗಡಿಗರು ಇತ್ತೀಚಿನ ಪಿಎಲ್ಓಎಸ್ ಒನ್ ಪತ್ರಿಕೆಯಲ್ಲಿ ವರದಿ ಮಾಡಿದ್ದಾರೆ.

ಇದು ಸುದ್ದಿ ಏಕೆಂದರೆ ಇದುವರೆವಿಗೂ ಅಯಸ್ಕಾಂತ ಹಾಗೂ ಕಾಂತವಲಯಗಳ ಪ್ರಭಾವವನ್ನು ಜೀವಿಗಳ ಚಲನೆಯ ಮೇಲಾಗುತ್ತದೆಂದಷ್ಟೆ ಗುರುತಿಸಲಾಗಿತ್ತು. ಆದರೆ ಈ ಸುದ್ದಿ ಕಾಂತವಲಯಗಳು ಸಂತಾನೋತ್ಪತ್ತಿಯ ಚಟುವಟಿಕೆಗಳನ್ನೂ ಪ್ರಭಾವಿಸುತ್ತದೆಂದು ಸೂಚಿಸಿವೆ. ಚಿಯಾಲಿನ್ ವೂ ತಂಡ ಈ ವಿದ್ಯಮಾನವನ್ನು ಹಣ್ಣಿನ ನೊಣ ಡ್ರೋಸೋಫಿಲಾ ಮೇಲೆ ನಡೆಸಿದ ಪ್ರಯೋಗಗಳ ಮೂಲಕ ಅರಿತುಕೊಂಡಿದೆ.

ಜೀವಿಗಳ ಮೇಲೆ ಕಾಂತ ವಲಯದ ಪ್ರಭಾವ ಇರುವ ಬಗ್ಗೆ ಅಚ್ಚರಿಯೇನಿಲ್ಲ. ಏಕೆಂದರೆ ಕೋಟ್ಯಂತರ ಜೀವಿಗಳ ನೆಲೆಯಾಗಿರುವ ಈ ಭೂಮಿಯೇ ಒಂದು ದೊಡ್ಡ ಅಯಸ್ಕಾಂತ. ಇದರ ಪ್ರಭಾವ ಜೀವಿಗಳ ಮೇಲೂ ಇರಬಹುದು. ಇದಕ್ಕೆ ಒಂದು ಉದಾಹರಣೆ ಎಂದರೆ ಚಿಟ್ಟೆ ಹಾಗೂ ಹಕ್ಕಿಗಳ ವಲಸೆ. ಹಕ್ಕಿಗಳು ವಲಸೆ ಹೋಗುವಾಗ ತಮ್ಮ ದಿಕ್ಕನ್ನು ಗುರುತಿಸಲು ಭೂಮಿಯ ಅಯಸ್ಕಾಂತದ ವಲಯಗಳನ್ನು ಬಳಸುತ್ತವೆ ಎಂದು ನಂಬಲಾಗಿದೆ. ಏಕೆಂದರೆ ಬೆಳಗಿನ ಹೊತ್ತು ವಲಸೆ ಹೋಗುವ ಹಕ್ಕಿಗಳಿಗೆ ಸೂರ್ಯ ದಿಕ್ಕು ತೋರಿಸುತ್ತಾನೆ. ಆದರೆ ರಾತ್ರಿ ಹೊತ್ತು ಸೂರ್ಯನಿಲ್ಲದಾಗಲೂ ದಿಕ್ಸೂಚಿಯಾಗಬಲ್ಲ ಸಂಗತಿ ಎಂದರೆ ಭೂಕಾಂತವಲಯ. ಹಕ್ಕಿಗಳು ಕಾಂತವಲಯದ ಪ್ರಭಾವದ ನೆರವಿನಿಂದ ಭೂಮಿಯ ಉತ್ತರ ಹಾಗೂ ದಕ್ಷಿಣ ಧ್ರುವಗಳನ್ನು ಗುರುತಿಸಿ ಹಾರುತ್ತಿರಬಹುದು ಎನ್ನುವ  ಬಗ್ಗೆ ಹಲವು ಪುರಾವೆಗಳಿವೆ.

ಕಾಂತ ವಲಯ ಎಂದರೆ ಒಂದು ಅಯಸ್ಕಾಂತದ ಪ್ರಭಾವ ಹರಡಿರುವ ನೆಲೆ. ಈ ಪ್ರಭಾವ ಅಯಸ್ಕಾಂತದ ಒಂದು ಧ್ರುವದಿಂದ ಮತ್ತೊಂದು ಧ್ರುವದ ವರೆಗೆ ವ್ಯಾಪಿಸಿರುತ್ತದೆ, ಈ ವಲಯದೊಳಗೆ ಯಾವುದೇ ವಿದ್ಯುತ್ ವಾಹಕ ವಸ್ತು ಬಂದರೂ ಅದರಲ್ಲಿ ವಿದ್ಯುತ್ ಅಥವಾ ಕಾಂತ ಶಕ್ತಿಯುಂಟಾಗಬಹುದು. ಧ್ರುವಗಳ ದಿಕ್ಕಿನಲ್ಲೇ ಇದ್ದಲ್ಲಿ ಹೀಗಾಗುವ ವಿದ್ಯುತ್ ಅಥವಾ ಕಾಂತ ಶಕ್ತಿಯ ಪ್ರಭಾವ ಹೆಚ್ಚು. ಧ್ರುವಗಳ ದಿಕ್ಕಿಗೆ ಅಡ್ಡಲಾಗಿದ್ದಲ್ಲಿ ಕಡಿಮೆ. ಈ ವಿದ್ಯಮಾನವನ್ನು ಬಳಸಿಕೊಂಡು ದಿಕ್ಸೂಚಿಗಳು ಭೂಮಿಯ ಉತ್ತರ ಮತ್ತು ದಕ್ಷಿಣ ಧ್ರುವವನ್ನು ಸೂಚಿಸುತ್ತವಷ್ಟೆ. ಹಾಗೆಯೇ ತಮ್ಮೊಳಗಿರುವ ಕಿರು ಕಾಂತಗಳನ್ನು ಬಳಸಿಕೊಂಡು ಹಕ್ಕಿಗಳು ದಿಕ್ಕುಗಳನ್ನು ಗುರುತಿಸುತ್ತಿರಬಹುದು ಎನ್ನುವ ಊಹೆಯಿದೆ.

ಜೀವಿಗಳಲ್ಲಿ ಕಾಂತಶಕ್ತಿಯ ಸಂವೇದನೆ ಹೇಗಾಗುತ್ತದೆನ್ನುವ ಬಗ್ಗೆ ಹಲವು ಊಹೆಗಳಿವೆ. ಅಯಸ್ಕಾಂತದ ಜೊತೆಗೆ ಮೊಳೆಯನ್ನು ಉಜ್ಜಿದಾಗ ಮೊಳೆಯೂ ಅಯಸ್ಕಾಂತವಾಗುತ್ತದಷ್ಟೆ. ಇಂತಹ ವಿದ್ಯಮಾನದಿಂದ ಜೀವಿಗಳಲ್ಲಿರುವ ಅಣುಗಳೂ ಸೂಕ್ಷ್ಮ ಅಯಸ್ಕಾಂತಗಳಾಗಿ ಭೂಕಾಂತವನ್ನು ಗುರುತಿಸುತ್ತಿರಬಹುದೆನ್ನುವುದು ಮೊದಲ ಊಹೆ. ಮುಖ್ಯವಾಗಿ ಇದು ಸಮುದ್ರಜೀವಿಗಳಲ್ಲಿ ಆಗುತ್ತಿರಬಹುದೆಂದು ವಿಜ್ಞಾನಿಗಳು ನಂಬಿದ್ದರೂ ಸಾಕ್ಷಿಗಳು ದೊರೆತಿಲ್ಲ. ಅಥವಾ ಜೀವಿಗಳ ದೇಹದಲ್ಲಿ ಅತಿ ಸೂಕ್ಷ್ಮವಾದ ಕಾಂತಗುಣವುಳ್ಳ ವಸ್ತುಗಳಿರಬಹುದು. ಇವುಗಳು ಕಾಂತಶಕ್ತಿಯನ್ನು ಗ್ರಹಿಸುತ್ತಿರಬಹುದು ಎನ್ನುವ ಊಹೆಯೂ ಇದೆ. ಇದಕ್ಕೆ ಅನುಗುಣವಾಗಿ ಪಾರಿವಾಳಗಳ ಮಿದುಳಿನಲ್ಲಿ ಹಾಗೂ ಇನ್ನೂ ಕೆಲವು ಜೀವಿಗಳಲ್ಲಿ ಕಾಂತಗುಣವುಳ್ಳ ಸೂಕ್ಷ್ಮ ಹರಳುಗಳು ಸಿಕ್ಕಿವೆ. ಇವ್ಯಾವುದೂ ಇಲ್ಲದ ಕಡೆ ಕಾಂತ ಶಕ್ತಿಯ ಪ್ರಭಾವದಿಂದಾಗಿ ಕೆಲವು ರಾಸಾಯನಿಕ ಕ್ರಿಯೆಗಳಾಗುತ್ತಿರಬಹುದು. ಇವು ಕಾಂತ ಶಕ್ತಿಯನ್ನು ಗ್ರಹಿಸಲು ನೆರವಾಗುತ್ತಿರಬಹುದೆನ್ನುವ ಮತ್ತೊಂದು ವಾದವೂ ಇದೆ. ಇಂತಹ ರಾಸಾಯನಿಕ ಕ್ರಿಯೆಗಳು ಬೆಳಕಿಗೆ ಪ್ರತಿಕ್ರಿಯಿಸುವಂತಹ ಕೆಲವೇ ಜೀವಕೋಶಗಳಲ್ಲಿ ಆಗುತ್ತಿರಬಹುದು. ಕಾಂತಶಕ್ತಿಯಿಂದಾಗಿ ಆಗುವ ಕ್ರಿಯೆಗಳು ಬೆಳಕಿಗೆ ಪ್ರತಿಕ್ರಿಯಿಸುವಂತಹ ವಸ್ತುಗಳನ್ನು ಸೃಷ್ಟಿಸುತ್ತಿರಬಹುದೆನ್ನುವುದು ಮೂರನೆಯ ವಾದ. ಅರ್ಥಾತ್. ಕಾಂತ ಶಕ್ತಿಯನ್ನು ಗ್ರಹಿಸಲು ಕಾಂತಶಕ್ತಿಯಿರುವ ವಸ್ತುಗಳು ಇರಲೇಬೇಕಿಲ್ಲವೆನ್ನುತ್ತದೆ ಈ ವಾದ.  ಇದೀಗ ಚಿಯಾಲಿನ್ ವೂ ತಂಡ ಗುರುತಿಸಿರುವುದು ಈ ಮೂರನೆಯ ತೆರನ ಕಾಂತಶಕ್ತಿ ಸಂವೇದನೆ ಹಣ್ಣಿನ ನೊಣಗಳಲ್ಲಿ ಪ್ರಣಯಕೇಳಿಯನ್ನು ಉತ್ತೇಜಿಸುತ್ತದೆ ಎಂದು ಗುರುತಿಸಿದ್ದಾರೆ. ಡ್ರೊಸೊಫಿಲಾ ನೊಣಗಳಲ್ಲಿ ಕ್ರಿಪ್ಟೋಕ್ರೋಮುಗಳೆನ್ನುವ ಪ್ರೋಟೀನುಗಳು ಈ ಕೆಲಸ ಮಾಡುತ್ತಿರಬಹುದು ಎನ್ನುವ ಊಹೆ ವೂ ತಂಡದ್ದು.

ಕ್ರಿಪ್ಟೊಕ್ರೋಮುಗಳಿಗೂ ಪ್ರಾಣಿಗಳ ನಡವಳಿಕೆಗೂ ಸಂಬಂಧವಿರಬಹುದೆನ್ನುವ ಗುಮಾನಿ ಹೊಸತೇನಲ್ಲ. ಹಕ್ಕಿಗಳ ಕಣ್ಣಿನಲ್ಲಿ ಇಂತಹ ಪ್ರೊಟೀನುಗಳಿವೆ. ಇವು ಬೆಳಕಿನ ಕೆಲವು ವರ್ಣ ತರಂಗಗಳನ್ನು ಮಾತ್ರ ಸಂವೇದಿಸುತ್ತವೆ. ತನ್ಮೂಲಕ ಹಗಲು, ರಾತ್ರಿಯ ಕಾಲಗಣನೆಗೆ ನೆರವಾಗುತ್ತವೆ. ಇವುಗಳಿಂದಾಗಿ ಹಕ್ಕಿಗಳು ಹಗಲು, ರಾತ್ರಿಯೇನೆಂಬುದನ್ನು ಅರಿಯಬಲ್ಲುವು. ನೀಲಿ ಹಾಗೂ ನೇರಳಾತೀತ ಬೆಳಕಿನ ತರಂಗಗಳಿಗೆ ಸ್ಪಂದಿಸುವ ಕ್ರಿಪ್ಟೋಕ್ರೋಮುಗಳಲ್ಲಿ ಬೆಳಕಿನಿಂದ ಚುರುಕಾಗುವ ಫ್ಲೇವಿನ್ ಅಡೆನಿನ್ ಡೈನ್ಯೂಕ್ಲಿಯೋಟೈಡ್ ಎನ್ನುವ ರಾಸಾಯನಿಕವಿದೆ. ಇದು ಬೆಳಕನ್ನು ಹೀರಿಕೊಂಡು ರಾಸಾಯನಿಕ ಕ್ರಿಯೆಯನ್ನು ಆರಂಭಿಸುತ್ತದೆ. ದೃಷ್ಟಿಗೂ, ಹಗಲು-ರಾತ್ರಿಯ ವ್ಯತ್ಯಾಸವನ್ನು ತಿಳಿಯಲೂ ನೆರವಾಗುತ್ತದೆ. ಹಕ್ಕಿಗಳ ಕಣ್ಣುಗಳಲ್ಲಿ ಇಂತಹ ಹಲವು ಕ್ರಿಪ್ಟೋಕ್ರೋಮುಗಳನ್ನು ಗುರುತಿಸಲಾಗಿದೆ.

ಆದರೆ ಡ್ರೋಸೋಫಿಲಾದಲ್ಲಿ ಒಂದೇ ಒಂದು ಈ ಬಗೆಯ ಪ್ರೊಟೀನು ಇದೆ. ಇದುವೂ ಕಣ್ಣಿನಲ್ಲಿಲ್ಲ. ನೊಣದ ಮಿದುಳಿನಲ್ಲಿದೆ. ಅಲ್ಲಿ ಇದು ಹಗಲು-ರಾತ್ರಿಯನ್ನು ತಿಳಿಸುವ ಜೈವಿಕ ಗಡಿಯಾರವನ್ನು ಚಾಲಿಸುತ್ತಿರಬಹುದು ಎನ್ನುತ್ತಾರೆ ವಿಜ್ಞಾನಿಗಳು.  ಈ ಹಿಂದೆ ಅಧ್ಯಯನದ ವೇಳೆ ಏಕತೆರನಾದ ಕಾಂತಶಕ್ತಿಯಲ್ಲಿ ನೊಣಗಳನ್ನು ಇಟ್ಟಾಗ ಅವುಗಳ ಜೈವಿಕ ಗಡಿಯಾರ ನಿಧಾನವಾಗಿ, ಕಾಲಪ್ರವೃತ್ತಿಗಳು ಏರುಪೇರಾಗಿದ್ದುವು. ಹಾಗಿದ್ದರೆ ಈ ಕ್ರಿಪ್ಟೋಕ್ರೋಮುಗಳು ಬೆಳಕನ್ನಷ್ಟೆ ಅಲ್ಲ, ಕಾಂತಶಕ್ತಿಯನ್ನೂ ಗ್ರಹಿಸಬಲ್ಲುವೇ ಎನ್ನುವ ಸಂದೇಹವೆದ್ದಿತ್ತು.

ಇದನ್ನು ತೀರ್ಮಾನಿಸಲು ವೂ ಮತ್ತು ಸಂಗಡಿಗರು ನೊಣಗಳನ್ನು ಪ್ರಣಯಕೇಳಿಯಾಡಿಸಿದರು. ನೊಣಗಳಲ್ಲಿ ಪ್ರಣಯದಾಟ ಯಾವಾಗೆಂದರೆ ಆವಾಗ ನಡೆಯುವುದಿಲ್ಲ. ಏನಿದ್ದರೂ ಕತ್ತಲಾಗಬೇಕು. ಅದು ಅವಕ್ಕೆ ತಿಳಿಯಬೇಕು. ಅರ್ಥಾತ್ ಇದು ಜೈವಿಕ ಗಡಿಯಾರದ ನಿಯಂತ್ರಣದಲ್ಲಿರುವ ಒಂದು ಚಟುವಟಿಕೆ. ಭೂಮಿಯ ಕಾಂತಶಕ್ತಿಯ ಹತ್ತುಪಟ್ಟು ಹೆಚ್ಚು ಕಾಂತಶಕ್ತಿಯಿರುವ ಒಂದು ಸಾಧನವನ್ನು ಇವರು ನಿರ್ಮಿಸಿದರು. ಈ ರಂಗಮಂಚದಲ್ಲಿ ವಿವಿಧ ತಳಿಯ ಗಂಡು-ಹೆಣ್ಣುಗಳನ್ನು ಬಿಡಲಾಯಿತು. ವಿವಿಧ ಕಾಂತಶಕ್ತಿಯನ್ನು ನಿರ್ಮಿಸಿ ಗಂಡು-ಹೆಣ್ಣುಗಳ ಚಟವಟಿಕೆಯನ್ನು ಗಮನಿಸಲಾಯಿತು. ಗಂಡುಗಳು ಹೆಣ್ಣನ್ನು ಆಕರ್ಷಿಸಲು ಅವನ್ನು ಮುಟ್ಟುತ್ತವೆ. ಒತ್ತರಿಸಿಕೊಂಡು ನಡೆಯುತ್ತವೆ. ಬಳಿಸಾರಿ ರೆಕ್ಕೆಗಳನ್ನು ಬಡಿಯುತ್ತವೆ. ಮೀಸೆಯಿಂದ ಬಡಿಯುತ್ತವೆ. ಹತ್ತು ನಿಮಿಷದಲ್ಲಿ ಅವು ಇಂತಹದುವನ್ನು ಎಷ್ಟು ಬಾರಿ ಮಾಡುತ್ತವೆನ್ನುವುದೇ ಪ್ರಣಯದಾಟದ ಉತ್ಕಟತೆಯ ಸೂಚಿ.

ಕಾಂತಶಕ್ತಿ ಹೆಚ್ಚಾದಂತೆ ಗಂಡುಗಳ ಪ್ರಣಯದಾಟವೂ ಉತ್ಕಟವಾಯಿತು. ಇವರು ಉಪಯೋಗಿಸಿದ ಮೂರು ವಿಭಿನ್ನ ತಳಿಗಳಲ್ಲಿ ವ್ಯತ್ಯಾಸವಿದ್ದರೂ, ಕಾಂತಶಕ್ತಿ ಬಳಸಿದಾಗ ಪ್ರಣಯದಾಟ ಸಾಮಾನ್ಯಕ್ಕಿಂತಲೂ ಹೆಚ್ಚುತ್ತಿದ್ದುದು ಕಂಡು ಬಂತು. ಇದಕ್ಕೂ ಬೆಳಕಿಗೂ ಏನಾದರೂ ಸಂಬಂಧವಿದೆಯೋ ಎನ್ನುವುದನ್ನು ಗಮನಿಸಲು ವೂ ಮತ್ತೊಂದು ಪ್ರಯೋಗ ಮಾಡಿದರು. ಕಾಂತಶಕ್ತಿಯನ್ನು ಹೆಚ್ಚಿಸಿ, ನೀಲಿ ಬೆಳಕನ್ನು ಮಂದವಾಗಿಸಿದರು. ಈ ಸಂದರ್ಭದಲ್ಲಿ ಗಂಡುಗಳಾಟ ತುಸು ಕಡಿಮೆಯಾಯಿತು.

ಹೀಗೇಕೆ ಎನ್ನುವುದನ್ನು ತಿಳಿಯಲು  ಜೈವಿಕ ತಂತ್ರಜ್ಞಾನದ ಮೂಲಕ ಕ್ರಿಪ್ಟೊಕ್ರೋಮ್ ಪ್ರೋಟೀನನ್ನು ತಯಾರಿಸಲಾಗದ ನೊಣದ ತಳಿಗಳನ್ನು ಸೃಷ್ಟಿಸಿದರು. ಈ ತಳಿಯ ಗಂಡು-ಹೆಣ್ಣುಗಳನ್ನು ತಮ್ಮ ಕಾಂತಸಾಧನದೊಳಗಿಟ್ಟು ಕಾಂತಶಕ್ತಿಯನ್ನು ಹೆಚ್ಚಿಸಿದರು. ಗಂಡು-ಹೆಣ್ಣುಗಳ ಆಟ ಹೆಚ್ಚಿತೇ ಎಂದು ಗಮನಿಸಿದರು. ಕ್ರಿಪ್ಟೊಕ್ರೋಮ್ ಪ್ರೊಟೀನುಗಳಿಲ್ಲದ ನೊಣಗಳಲ್ಲಿ ಕಾಂತಶಕ್ತಿಯ ಪ್ರಭಾವ ಇಲ್ಲವೇ ಇಲ್ಲ ಎನ್ನುವಂತಿತ್ತು.

ಅಂದರೆ ಈ ಪ್ರೊಟೀನುಗಳು ಕಾಂತಶಕ್ತಿಯನ್ನು ಹೇಗೋ ಸಂವೇದಿಸಿ, ರಾಸಾಯನಿಕ ಕ್ರಿಯೆಗಳ ಮೂಲಕ ಮಿದುಳಿಗೆ ಸೂಚಿಸುತ್ತವೆ ಎನ್ನುವ ಅನುಮಾನವುಂಟಾಗುತ್ತದಷ್ಟೆ! ಇದನ್ನು ಸ್ಪಷ್ಟ ಪಡಿಸಿಕೊಳ್ಳಲು ನೊಣಗಳ ಮಿದುಳಿನಲ್ಲಿ ಜೈವಿಕ ಗಡಿಯಾರಗಳನ್ನು ಪ್ರತಿನಿಧಿಸುವ ನರಕೋಶಗಳನ್ನು ರಾಸಾಯನಿಕವಾಗಿ ಪ್ರಚೋದಿಸಿ ಪ್ರಯೋಗ ಮಾಡಿದರು. ಹೀಗೆ ರಾಸಾಯನಿಕವಾಗಿ ಪ್ರಚೋದಿಸಿದ ನೊಣಗಳು ಕ್ರಿಪ್ಟೋಕ್ರೋಮು ಪ್ರೊಟೀನು ತಯಾರಿಸುವ ಸಾಮರ್ಥ್ಯವಿಲ್ಲದಿದ್ದರೂ ಕಾಂತಶಕ್ತಿ ಹೆಚ್ಚಿದಂತೆ ಹೆಚ್ಚೆಚ್ಚು ಹೆಣ್ಣುಗಳ ಹಿಂದೆ ಬಿದ್ದುವು. ಅರ್ಥಾತ್, ಕ್ರಿಪ್ಟೊಕ್ರೋಮುಗಳು ಬೆಳಕಿಗಷ್ಟೆ ಅಲ್ಲ, ಕಾಂತಶಕ್ತಿಯನ್ನು ಗ್ರಹಿಸುತ್ತವೆ ಎನ್ನುವುದು ಹೀಗೆ ಸ್ಪಷ್ಟವಾಗಿದೆ. ಬೆಳಕಿನ ಗ್ರಹಿಕೆಗೂ, ಇತರೆ ಸಂವೇದನೆಗಳಿಗೂ, ಜೈವಿಕ ಗಡಿಯಾರಕ್ಕೂ ನಂಟು ಇದೆ ಎನ್ನುವುದಕ್ಕೆ ಮತ್ತೊಂದು ಪುರಾವೆ ದೊರೆತಿದೆ ಎನ್ನಬಹುದು.

_____________

A.S.K.V.S.Sharma, Sri Lakshmi, 30 Feet Road, 6th Main, Near Hampi Circle, Hebbal 2nd Stage, Mysore-570017; Phone: 9886640328; email: kollegala@gmail.com

ಆಕರ: Paula Stockley and Liane Hobson, Paternal Care and litter size coevolution in mammals. Proc. Royal Soc., B 283, 20160140 (http://dx.doi.org/10.1098/rspb.2016.0140)

ಹೆಚ್ಚಿನ ಓದಿಗೆ:

Wu C-L, Fu T-F, Chiang M-H, Chang Y-W, Her J-L, Wu T (2016) Magnetoreception Regulates Male Courtship Activity in Drosophila. PLoS ONE, 11(5): e0155942.  doi:10.1371/journal.pone.0155942

http://epaper.samyukthakarnataka.com/c/10648982

Published in: on ಮೇ 30, 2016 at 5:42 ಅಪರಾಹ್ನ  ನಿಮ್ಮ ಟಿಪ್ಪಣಿ ಬರೆಯಿರಿ  

ಅಪ್ಪನ ಬೆಲೆ

23052016

ಅಪ್ಪನ ಬೆಲೆ ಏನು?

ಕೊಳ್ಳೇಗಾಲ ಶರ್ಮ

ಮನೆ ಜಗಳದ ವಿಷಯ ಅಲ್ಲ ಬಿಡಿ. ಇದು ಜೀವಿವಿಜ್ಞಾನದ ವಿಸ್ಮಯ. ಹೌದು. ಜೀವಿಗಳಲ್ಲಿ ಗಂಡು ಹೆಣ್ಣು ಎನ್ನುವ ಭೇದವನ್ನು ಯಃಕಶ್ಚಿತ್ ಕೀಟಗಳಿಂದ ಮಾನವನವರೆಗೂ ಕಾಣುತ್ತೇವೆ. ಜೀವಿಗಳ ಬೆಳೆವಣಿಗೆ, ಉಳಿವಿಗೆ ಹೆಣ್ಣಿನ ಕೊಡುಗೆ ಏನೆಂಬುದನ್ನು ವಿವರಿಸಬೇಕಿಲ್ಲ. ನೂರಾರು ಸಂತಾನವನ್ನು ಹೆರುವ ಹೊಣೆ ಹೆಣ್ಣಿನದ್ದೇ. ಅದಕ್ಕೇ ಅದಕ್ಕೆ ಅಮ್ಮನ ಪಟ್ಟ. ಹಾಗಿದ್ದರೆ ಗಂಡಿನ ಪಾತ್ರವೇನು? ಕೇವಲ ಸಂತಾನಾಭಿವೃದ್ಧಿ ಮಾಡಲಿ ಎಂದು ಹೆಣ್ಣಿಗೆ ವೀರ್ಯಾಣುವನ್ನು ಕೊಡುವುದಷ್ಟೆ ಗಂಡಿನ ಕೆಲಸವೆ? ಅಥವಾ ಅದಕ್ಕಿಂತಲೂ ಹೆಚ್ಚಿನದೇನಾದರೂ ಇದೆಯೋ? ಇದು ಪ್ರಶ್ನೆ.

 

ಈ ಪ್ರಶ್ನೆಯೊಳಗೆ ಅಡಗಿದೆ ಅಪ್ಪನ ಕುರಿತ ಇನ್ನೊಂದು ಪ್ರಶ್ನೆ. ಅಪ್ಪ ಅನ್ನುವ ಕಿರೀಟ ಎಲ್ಲ ಗಂಡುಗಳಿಗೂ ಇಲ್ಲ. ಉದಾಹರಣೆಗೆ, ಮೀನುಗಳಲ್ಲಿ ಅವಿರುವ ನೆಲೆಯಲ್ಲೇ ಹೆಣ್ಣು ಮೊಟ್ಟೆಯಿಡುತ್ತದೆ, ಗಂಡು ಆ ಮೊಟ್ಟೆಯ ಮೇಲೆ ವೀರ್ಯದ ಮಳೆಗೈಯುತ್ತದೆ. ಇದಾದ ನಂತರ ಗಂಡು ಎಲ್ಲೋ, ಹೆಣ್ಣು ಎಲ್ಲೋ? ಅಪರೂಪಕ್ಕೆ ಕೆಲವು ಮೀನುಗಳಲ್ಲಿ ಗಂಡು-ಹೆಣ್ಣುಗಳೆರಡೂ ಮೊಟ್ಟೆಗಳು ಒಡೆಯುವವರೆಗೂ ಗೂಡನ್ನು ಕಾಯುವುದುಂಟು. ಅನಂತರ ಅವರವರ ದಾರಿ ಅವರವರಿಗೆ. ಕೀಟಗಳಲ್ಲೂ, ಇತರೆ ಜೀವಿಗಳಲ್ಲೂ ಇದೇ ಸ್ಥಿತಿಯನ್ನು ಕಾಣಬಹುದು. ಜೇಡಗಳಲ್ಲಿ ಇನ್ನೂ ವಿಚಿತ್ರ. ಹೆಣ್ಣಿನ ಜೊತೆ ಕೂಡಿದ ನಂತರ ಗಂಡು ಅದೇ ಹೆಣ್ಣಿಗೆ ಆಹಾರವಾಗಿಬಿಡುತ್ತದೆ! ಹುತಾತ್ಮನಾಗುತ್ತದೆ. ಇರುವೆ, ಜೇನ್ನೊಣಗಳಂತಹ ಕೆಲವು ಕೀಟಗಳಲ್ಲಿ ಮರಿಗಳ ಪೋಷಣೆಗೂ ವ್ಯವಸ್ಥೆಯೇನೋ ಇದೆ. ಆದರೆ ಇಲ್ಲಿ ಪೋಷಕರು ವೀರ್ಯ ಕೊಟ್ಟ ಗಂಡುಗಳಲ್ಲ. ಅದಕ್ಕಾಗಿಯೇ ಹುಟ್ಟಿದ ಕಾರ್ಮಿಕ ಕೀಟಗಳು.

 

ಅಪ್ಪನೆಂಬ ಜವಾಬುದಾರಿ ಹೆಚ್ಚಿಗೆ ಕಾಣುವುದು ಹಕ್ಕಿಗಳಲ್ಲಿ ಹಾಗೂ ಸ್ತನಿಗಳಲ್ಲಿ. ಹಲವು ಹಕ್ಕಿಗಳ ಗಂಡುಗಳು ಮೊಟ್ಟೆಯೊಡೆದು ಬಂದ ಮರಿ ರೆಕ್ಕೆ ಬಲಿತು ಹಾರುವವರೆಗೂ ಹೆಣ್ಣಿಗೆ ಹೆಗಲು ಕೊಟ್ಟು ಜೊತೆಯಾಗಿರುತ್ತದೆ. ಹಾಗೆಂದು ಇವುಗಳೆಲ್ಲವೂ ಮರಿಗಳಿಗೆ ಉಣಿಸು ನೀಡುವುದಿಲ್ಲ. ಹೆಚ್ಚೆಂದರೆ ಮೊಟ್ಟೆಗೆ ಕಾವಿಡಬಹುದು, ಮರಿಗಳನ್ನು ತಿನ್ನಲು ಹೊಂಚು ಹಾಕುವ ಹಾವಿನಂತಹ ವೈರಿಗಳ ಜೊತೆ ಕಾದಾಡಿ ಕಾಯಬಹುದು, ಅಥವಾ ಆಹಾರ ತರಲು ಹೆಣ್ಣು ಹೊರ ಹೋದಾಗ ತಾನು ಮರಿಗಳನ್ನು ಕಾಯಬಹುದು.

 

ನಿಜವಾದ ಅಪ್ಪಂದಿರು ಕಾಣುವುದು ಸ್ತನಿಗಳಲ್ಲಿ. ಪ್ರಪಂಚದಲ್ಲಿರುವ ಎಲ್ಲ ಸ್ತನಿಗಳಲ್ಲಿ ಶೇಕಡ ಹತ್ತರಷ್ಟು ಜೀವಿಗಳಲ್ಲಿ ಗಂಡು ಅಪ್ಪನ ಜವಾಬುದಾರಿಯನ್ನು ಹೊರುತ್ತದೆ. ಹಾಗಂತ ಎಲ್ಲ ಸ್ತನಿಗಳಲ್ಲೂ ಅಪ್ಪಂದಿರೆನ್ನುವ ಪ್ರಾಣಿಗಳಿರುವುದಿಲ್ಲ. ಗಂಡುಗಳಿರುತ್ತವೆಯಷ್ಟೆ. ಗೂಳಿ ಎಲ್ಲಿಯಾದರೂ ಕರುವಿನ ಆರೈಕೆ ಮಾಡುವುದನ್ನು ನೋಡಿದ್ದೀರೇ? ಏಕಪತ್ನೀವ್ರತಸ್ತನೆನ್ನುವ ಒಂದೇ ಹೆಣ್ಣಿನ ಜೊತೆ ಕೂಡುವ ಪ್ರಾಣಿಗಳಲ್ಲಿ ಅರ್ಧಕ್ಕರ್ಧದವುಗಳಲ್ಲಿ ಅಪ್ಪನ ನಡವಳಿಕೆ ಕಾಣುತ್ತದೆ. ಮನುಷ್ಯನಲ್ಲಿ ಮಾತ್ರ ಗಂಡು-ಹೆಣ್ಣು ಇಬ್ಬರೂ ಹೆತ್ತ ಮಕ್ಕಳ ಜೀವನದ ಕೊನೆಯವರೆಗೂ ಜೊತೆಗಿರುತ್ತಾರೆ. ಅಪ್ಪ-ಅಮ್ಮ ಎನ್ನಿಸಿಕೊಳ್ಳುತ್ತಾರೆ.

 

ಇಲ್ಲಿ ಅಪ್ಪನ ಬೆಲೆ ಏನು? ಸಂತಾನವನ್ನು ಕಾಯಲಿಕ್ಕಾ ಅಥವಾ ಸಂತಾನವನ್ನು ಹೆಚ್ಚಿಸಲಿಕ್ಕಾ? ಬರೇ ಸಂತಾನವಷ್ಟೆ ಸಾಕು ಎಂದರೆ ಅಮ್ಮನಷ್ಟೆ ಮಕ್ಕಳ ಪಾಲನೆ ಪೋಷಣೆಯನ್ನು ಮಾಡಿದರೆ ಸಾಕಲ್ಲವೇ? ಅಪ್ಪ ಎನ್ನುವ ಜವಾಬುದಾರಿ ಇಲ್ಲದೆ ಬರೇ ಗಂಡಸ್ತನ ತೋರುವ ಗಂಡಾಗಿದ್ದರೂ ಸಾಕಿತ್ತು ಅಲ್ಲವೇ? ಇವು ತರಲೆ ಪ್ರಶ್ನೆಗಳಲ್ಲ. ಜೀವಿಗಳ ವಿಕಾಸ ಹೇಗಾಯಿತು, ಏಕಾಯಿತು ಎನ್ನುವ ರಹಸ್ಯವನ್ನು ಅರಿಯುವ ಪ್ರಶ್ನೆಗಳು. ಹಾಗಾಗಿ ಈ ಬಗ್ಗೆ ಜೀವಿವಿಜ್ಞಾನಿಗಳ ಆಸಕ್ತಿ. ಗಂಡಿನ ಜೀವನದಲ್ಲಿ ಈ ಹೊಣೆಗಾರಿಕೆ ಇರಲೇಬೇಕೆಂದಿಲ್ಲ. ಆದರೂ ಹೀಗೇಕೆ? ಅಪ್ಪನೆಂಬ ಸ್ಥಾನ ವಿಕಾಸವಾಗಿದ್ದೇಕೆ? ಇದರಿಂದ ಆ ಪ್ರಾಣಿಗೇನು ಲಾಭ?

ಅರ್ಥವಾಗಲಿಲ್ಲ ಎಂದಿರಾ? ಲಾಭ-ನಷ್ಟ ಕೇವಲ ವ್ಯಾಪಾರದ ಲೆಕ್ಕಾಚಾರವಲ್ಲ. ಜೀವಿಗಳ ಅಳಿವು-ಉಳಿವನ್ನೂ ಲಾಭ-ನಷ್ಟವೆಂದೇ ವಿಜ್ಞಾನಿಗಳು ಪರಿಗಣಿಸುತ್ತಾರೆ. ಇಲ್ಲಿ ಲಾಭವೆಂದರೆ ಜೀವಿಯ ಉಳಿವು. ಅದಕ್ಕೆ ತೆರುವ ಬೆಲೆ ಎಂದರೆ ಜೀವಿ ಪಡುವ ಕಷ್ಟ. ಯಾವುದೇ ಜೀವಿಯ ಪ್ರತಿಯೊಂದು ನಡವಳಿಕೆಯನ್ನೂ ಈ ಅರ್ಥದಲ್ಲಿಯೇ ವಿಶ್ಲೇಷಿಸುವುದು ಜೀವಿವಿಜ್ಞಾನಿಗಳ ಕ್ರಮ. ಯಾವುದೇ ನಡವಳಿಕೆಯೂ ಆ ಜೀವಿಯ ಸಂತತಿಯ ಉಳಿವಿಗೆ ಪೂರಕವಾಗಿರಲೇ ಬೇಕು. ಇಲ್ಲದಿದ್ದರೆ ಅದನ್ನು ಪ್ರಕೃತಿ ಎಂದೋ ಅನವಶ್ಯಕ ಎಂದು ಕಿತ್ತು ಬಿಸಾಡಿಬಿಡುತ್ತಿತ್ತು ಎನ್ನುವುದು ಈ ತರ್ಕದ ಹಿಂದಿರುವ ವಿಶ್ವಾಸ.

ಜೀವವಿಜ್ಞಾನಿಗಳ ಈ ಕುತೂಹಲಕ್ಕೆ ಒಂದು ಉದಾಹರಣೆ ಮೊನ್ನೆ ಮೇ 16ರಂದು ಪ್ರೊಸೀಡಿಂಗ್ಸ್ ಆಫ್ ರಾಯಲ್ ಸೊಸೈಟಿ-ಬಿ ಪತ್ರಿಕೆಯಲ್ಲಿ ಪ್ರಕಟವಾಗಿರುವ ಸಂಶೋಧನೆ. ಇಂಗ್ಲೆಂಡಿನ ಲಿವರ್ ಪೂಲ್ ವಿವಿಯ ವಿಜ್ಞಾನಿಗಳಾದ ಪೌಲಾ ಸ್ಟಾಕ್ಲಿ ಮತ್ತು ಲಯೇನ್ ಹಾಬ್ಸನ್ ಈ ಪತ್ರಿಕೆಯಲ್ಲಿ ಪ್ರಕಟಿಸಿರುವ ಸುದ್ದಿಯ ಪ್ರಕಾರ ಬೃಹತ್ ಸಂಸಾರವನ್ನು ಸ್ಥಾಪಿಸುವುದಕ್ಕಿಂತಲೂ, ಚಿಕ್ಕ ಚೊಕ್ಕ ಸಂತಾನವನ್ನು ಉಳಿಸಿ, ಬೆಳೆಸಲು ಗಂಡಿನ ಅವಶ್ಯಕತೆ ಇದೆ. ಇದಕ್ಕಾಗಿಯೇ ಕೆಲವು ಪ್ರಾಣಿಗಳಲ್ಲಿ ಗಂಡು ಅಪ್ಪನ ಅವತಾರ ತಾಳಿ ಹೆಣ್ಣಿನ ಜೊತೆ ಮಕ್ಕಳ ಪಾಲನೆ-ಪೋಷಣೆಯಲ್ಲಿ ಪಾಲ್ಗೊಳ್ಳುತ್ತದೆಯಂತೆ.

ಪ್ರಾಣಿಗಳಲ್ಲಿ, ವಿಶೇಷವಾಗಿ ಸ್ತನಿಗಳಲ್ಲಿ, ಅಪ್ಪನೆನ್ನುವ ಜವಾಬುದಾರಿ ಏಕೆ ಉದ್ಭವಿಸಿತು? ಈ ಪೋಷಕ ವೃತ್ತಿ ವಿಕಾಸವಾದದ್ದರಿಂದ ಏನು ಲಾಭ? ಯಾರಿಗೆ? ಸ್ಟಾಕ್ಲಿ ಮತ್ತು ಹಾಬ್ಸನ್ ಪ್ರಕಾರ ಸಂತಾನೋತ್ಪತ್ತಿ ಎನ್ನುವುದು ಬಲು ವೆಚ್ಚದ ಕೆಲಸ. ಇದಕ್ಕಾಗಿ ಜೀವಿಗಳು ಸಮಯ, ಶಕ್ತಿಯನ್ನು ವ್ಯಯಿಸುತ್ತವಷ್ಟೆ. ಅಷ್ಟು ವೆಚ್ಚ ಮಾಡಿದ ಮೇಲೆ ಬರುವ ಲಾಭ ಎಂದರೆ ತಮ್ಮ ಗುಣಗಳುಳ್ಳ ಸಂತಾನ.  ಸಂತಾನಗಳು ಬದುಕುಳಿದು ಮರಿಗಳನ್ನುಂಟು ಮಾಡಿದರಷ್ಟೆ ತಂದೆ-ತಾಯಂದಿರ ಶ್ರಮ ಸಾರ್ಥಕವಾದ ಹಾಗೆ. ವಂಶೋದ್ಧಾರಣೆಯೇ ಲಾಭ. ಆದ್ದರಿಂದ ವಂಶೋದ್ಧಾರಣೆಯಲ್ಲಿ ಅಪ್ಪನ ನಡವಳಿಕೆಯಿಂದ ಲಾಭವಿರಲೇಬೇಕು. ಏಕೆಂದರೆ ಅಪ್ಪನ ಜವಾಬುದಾರಿ ಹೊರುವುದು ಎಂದರೆ ಒಂದೇ ಹೆಣ್ಣಿನ ಜೊತೆ ಬಾಳುವುದು ಹಾಗೂ ಮರಿಗಳು ದೊಡ್ಡದಾಗುವುವರೆಗೂ ಹೆಣ್ಣಿನ ಜೊತೆ ಕೂಡುವ ಅಥವಾ ಮರಿ ಮಾಡುವ ಸಂದರ್ಭಗಳನ್ನು ಕಳೆದುಕೊಳ್ಳುವುದು ಎಂದಷ್ಟೆ. ಇದು ಗಂಡಿಗೆ ಆಗುವ ನಷ್ಟ.  ಗಂಡು ಈ ನಷ್ಟವನ್ನು ಸಹಿಸಿಕೊಳ್ಳುವುದೇಕೆ?

ಇದನ್ನು ವಿವರಿಸಲು ಮೊದಲು ಕೆಲವು ಊಹೆಗಳಿದ್ದುವು. ಉದಾಹರಣೆಗೆ, ಹೆಣ್ಣು ಹೆಚ್ಚು ಹೆರುವುದರಿಂದಾಗಿ ಅಪ್ಪನ ಪಾತ್ರ ಉದ್ಭವಿಸಿತು ಎನ್ನುವುದು ಒಂದು ಊಹೆ.  ಪ್ರಸವವೇ ಪ್ರಯಾಸವೆನ್ನಿಸುವಷ್ಟು ದೊಡ್ಡ ಗಾತ್ರದ ಮರಿಯನ್ನು ಹೆರುವಂತಹ ಹೆಣ್ಣುಗಳಿಗೆ ಗಂಡಿನ ನೆರವು ಬೇಕಾಗಿ ಬಂದು ಅಪ್ಪನ ಹೊಣೆ ಹುಟ್ಟಿರಬಹುದು ಎನ್ನುವುದು ಮತ್ತೊಂದು ಊಹೆ. ಅಥವಾ ಸಂಗಾತಿಯ ಜೊತೆಗಿನ ಬಂಧದಿಂದ ಇದು ಉಂಟಾಗಿರಬಹುದು ಎನ್ನುವುದು ಮೂರನೆಯ ಊಹೆ. ಸ್ಟಾಕ್ಲಿ ಮತ್ತು ಹಾಬ್ಸನ್ ಸಂಖ್ಯಾಶಾಸ್ತ್ರದ ನೆರವಿನಿಂದ ಈ ಊಹೆಗಳೆಷ್ಟು ನಿಜ ಎಂದು ಹುಡುಕಲು ಪ್ರಯತ್ನಿಸಿದ್ದಾರೆ.

ಇದಕ್ಕಾಗಿ ಸ್ಟಾಕ್ಲಿ ಮತ್ತು ಹಾಬ್ಸನ್ ಯಾವ್ಯಾವ ಪ್ರಾಣಿಗಳಲ್ಲಿ ಅಪ್ಪನ ಪಾತ್ರವನ್ನು ಗಂಡು ನಿರ್ವಹಿಸುತ್ತದೆ ಎನ್ನುವುದನ್ನು ಪಟ್ಟಿ ಮಾಡಿದರು. ಈ ಪಟ್ಟಿಯಲ್ಲಿರುವ ಪ್ರಾಣಿಗಳಲ್ಲಿ ಸರಾಸರಿ ಎಷ್ಟು ಸಂತಾನವಾಗಬಹುದು? ಒಮ್ಮೆಗೆ ಎಷ್ಟು ಮರಿಗಳಾಗಬಹುದು? ಗಂಡುಗಳೂ ಪಾಲನೆಯಲ್ಲಿ ಪಾಲ್ಗೊಂಡವುಗಳಲ್ಲಿ ಮರಿಗಳ ಸಂಖ್ಯೆ ಹೆಚ್ಚೋ? ಕಡಿಮೆಯೋ? ಇಂತಹ ಗಂಡುಗಳ ಸಂಗಾತಿ ತನ್ನ ಜೀವಮಾನದಲ್ಲಿ ಎಷ್ಟು ಬಾರಿ ಹೆರಬಹುದು? ಹೆತ್ತ ಮರಿಗಳಲ್ಲಿ ಉಳಿಯುವವುಗಳ ಪ್ರಮಾಣದಲ್ಲಿ ವ್ಯತ್ಯಾಸವಿರಬಹುದೇ? ಗಂಡು ಏಕಪತ್ನೀವ್ರತಸ್ತನೇ? ಬಹುಪತ್ನಿಯಿರುವ ಗಂಡಿನ ಸಂತಾನಗಳ ಸಂಖ್ಯೆಯೇನು ಎಂದೆಲ್ಲ ಮಾಹಿತಿಯನ್ನು ಕಲೆ ಹಾಕಿ ಅದನ್ನು ಗಂಡಿನ ನಡವಳಿಕೆಯ ಜೊತೆಗೆ ತಾಳೆ ನೋಡಿದರು.

ಈ ಲೆಕ್ಕಗಳ ಪ್ರಕಾರ ಗಂಡುಗಳು ಜವಾಬುದಾರಿ ವಹಿಸಿಕೊಂಡ ಪ್ರಾಣಿಗಳಲ್ಲೆಲ್ಲ ಮರಿಗಳ ಸಂಖ್ಯೆ ಹೆಚ್ಚಾಗಿರುವುದು ಕಂಡಿತು. ಪಾಲನೆ ಎಂದರೆ ಆಹಾರದ ಸರಬರಾಜಷ್ಟೆ ಅಲ್ಲ. ಏಕೆಂದರೆ ಬೆಕ್ಕಿನಂತಹ ಮಾಂಸಾಹಾರಿ ಪ್ರಾಣಿಗಳಲ್ಲಿ ಗಡವಗಳು ತನ್ನದೇ ಮಕ್ಕಳ ಜೊತೆಗೂ ಆಹಾರವನ್ನು ಹಂಚಿಕೊಳ್ಳವು.  ಗಡವ ಮಂಗಗಳು ಆಹಾರವನ್ನು ಸಂಪಾದಿಸಿ ಕೊಡದಿದ್ದರೂ, ಮರಿಗಳನ್ನು ಕಾಯವುದು, ಹೊತ್ತೊಯ್ಯುವಂತಹ ಕೆಲಸಗಳನ್ನು ಮಾಡುತ್ತವೆ. ಇನ್ನು ಕೆಲವು ಪ್ರಾಣಿಗಳಲ್ಲಿ ಏಕಪತ್ನೀಯತೆಯೂ ಜಾಸ್ತಿ. ಇವೆಲ್ಲವನ್ನೂ ತಾಳೆ ಹಾಕಿದಾಗ ಗೊತ್ತಾಗಿದ್ದು ಅಪ್ಪನೆಂಬ ನಡವಳಿಕೆ ಹುಟ್ಟಿದ್ದು ಹೆಚ್ಚು ಸಂತಾನವಿರುವುದರಿಂದಲ್ಲ. ಬದಲಾಗಿ ಈ ನಡವಳಿಕೆಯೇ ಹೆಚ್ಚು ಸಂತಾನ ಉಳಿಯುವುದಕ್ಕೆ ಕಾರಣವಾಗಿದೆ ಎನ್ನುವುದು. ಇದಲ್ಲದೆ ಏಕಪತ್ನೀಯತೆಯಂತಹ ಗಂಡು-ಹೆಣ್ಣಿನ ಸಂಬಂಧ ಗಟ್ಟಿಯಾಗಿದೆ ಮತ್ತು  ಮರಿಗಳ ಸಂಖ್ಯೆ ಹೆಚ್ಚಿದ್ದರೂ ಪಾಲನೆ ಸುಗಮವಾಗಿದೆ ಎನ್ನುತ್ತಾರೆ ಸ್ಟಾಕ್ಲಿ ಮತ್ತು ಹಾಬ್ಸನ್. ಅಪ್ಪನೆಂಬ ನಡವಳಿಕೆಯ ಜೊತೆ, ಜೊತೆಯಲ್ಲಿಯೇ ಈ ಲಾಭಗಳೂ ವಿಕಾಸವಾಗಿವೆಯಂತೆ. ಅಪ್ಪನಿರುವ ಪ್ರಾಣಿಗಳಲ್ಲಿ ಬದುಕುಳಿದು ತನ್ನ ಜೀವನ ಕರ್ತವ್ಯವನ್ನು ಪೂರೈಸುವ ಸಂತಾನಗಳ ಪ್ರಮಾಣ ಹೆಚ್ಚು.  ಇದು ಅಪ್ಪ ಹೊರೆ ಹೊರುವುದರ ಲಾಭ.

ಅಪ್ಪನಾಗುವುದರಿಂದ ಗಂಡಿನ ಸ್ವಂತಕ್ಕೆ ಕಷ್ಟವಾದರೂ ವಂಶಕ್ಕಾಗುವ ಲಾಭ ಎನ್ನೋಣವೇ?

_____________

 

ಆಕರ: Paula Stockley and Liane Hobson, Paternal Care and litter size coevolution in mammals. Proc. Royal Soc., B 283, 20160140  (http://dx.doi.org/10.1098/rspb.2016.0140)

ಸಂಯುಕ್ತ ಕರ್ನಾಟಕ ದಲ್ಲಿ ಪ್ರಕಟವಾಗಿದ್ದು.

Published in: on ಮೇ 23, 2016 at 5:10 ಫೂರ್ವಾಹ್ನ  Comments (1)